МАНІФЕСТ МІНСКАГА ВЕЛАСІПЕДНАГА ТАВАРЫСТВА

МАНІФЕСТ МІНСКАГА ВЕЛАСІПЕДНАГА ТАВАРЫСТВА
таварышы Маркс і Энгельс да напісання не далучаліся

З кожным годам у Мінску ўсё больш і больш людзей абіраюць веласіпед як найлепшы сродак для працы і адпачынку. Сапраўды, ці то даехаць у офіс, ці то выбрацца ў лес – веласіпед дае гэтую магчымасць, прычым эканамічна выгодную і экалагічна чыстую. Колькасць веласіпедыстаў пастаянна расце, і гэта бязмерна радуе кожнага ўладальніка двухколавага сябра.

Ды толькі вось бяда – веласіпедыстаў становіцца больш, а праблемы якія былі – такія і засталіся. Не зважаючы на тое, што патэнцыяльна Мінск вельмі зручны для велапаездак, умовы, якія ёсць у ім на дадзены момант, зусім не спрыяюць нам, шчырым веласіпедыстам. І вось дзеля таго, каб палегчыць нашую долю, і ствараецца Мінскае Веласіпеднае Таварыства!

Чаго мы хочам?

Ды вельмі простых рэчаў:

• каб пры планаванні гарадской інфраструктуры ўлічвалі інтарэсы веласіпедыстаў;
• каб з’явілася магчымасць не скакаць па бардзюрах;
• каб веладарожкі і велапалосы сталі нармальнай з’явай у нашым горадзе.

Ну, а таксама мы б хацелі завесці кантакты з веласуполкамі з іншых рэгіёнаў і дзяржаваў, увайсці ў European Cycling Federation, арганізоўваць веласіпедныя маршруты па ўсёй краіне, у тым ліку скласці маршрут EuroVelo EV2, і самае галоўнае – зрабіць так, каб веласіпед у нас заняў сваё пачэснае месца сярод усіх астатніх транспартых сродкаў і не ўспрымаўся, як цяпер, парыяй сярод эліты з рухавікамі ўнутраннага спальвання.

І мы гатовыя прыкладаць намаганні!

Далучайся!