16-17 чэрвеня. Запечаная курачка на Сяляве

Ну, панове, для тых, хто не з'еў з намі труса на Бабры, ёсць магчымасць з'есці курачку на Сяляве. Задумка надзвычай простая: у 06.10 16 чэрвеня (субота) збіраемся на Інстытуце культуры (чыгуначная станцыя), купляем квіточкі на электрычку да станцыі "Новае жыццё", і ў 06.30 рушым з крыкамі і енкамі. Новае жыццё наступае для нас у 08.46, пасля чаго сядаем на ровары і едзем у паўночным накірунку. Праязжаючы праз Крупкі, набываем курачку (дзве, тры - у залежнасці ад колькасці народу). Да самога возера ад станцыі кіламетраў дваццаць. Праязжаем іх спакойна і з радасцю, нікога не падганяем, усіх чакаем. На возеры знаходзім месца для стаянкі. Далей даецца прастора для творчай ініцыятывы, а менавіта: рыбакі могуць палавіць рыбу, аматары паўкручваць могуць паўкручваць, ахвочыя пакупацца лезуць і ваду і г.д. Тым часам арганізатар пакатушкі (гэта я) рыхтуе курыцу (ці курыц) шляхам адсякання галавы, абскубвання і патрашэння да перадачы шэф-повару, у ролі якога ласкава згадзіўся пабыць шаноўны Patrokl. Супольны абед, невялікі адпачынак і - аб'езд возера Сялява па крузе максімальна блізка да вады. Увечры, змораныя і вясёлыя, забіраемся ў намёты і пакуемся ў спальнікі. На наступны дзень едзем назад. Паколькі станцыя блізка і здым лёгкі, дакладны час пакідання Сялявы вызначым непасрэдна на месцы. 

Правілы паводзінаў падчас пакатушкі: добразычлівыя.

Неабходна браць: мінімум па адной, а таксама ўсё тое, што трэба ў дарозе і на стаянцы. Хто не ведае, няхай піша - удакладню. 

Ежа: браць перакус-перапіў на электрычку, усё астатняе купім на месцы. 

Абавязкова: прагаладацца да абеду!